ق ر مادەنيەت جانە سپورت مينيسترلىگىنىڭ تاپسىرىسى بويىنشا ش.ايمانوۆ اتىنداعى «قازاقفيلم» كينوستۋدياسى تۇسىرگەن «ارۋاق» ءفيلمى 71ء-شى كانن كينوفەستيۆالىندە اشىلعان قازاقستاننىڭ ۇلتتىق پاۆيلونىندا تانىستىرىلدى جانە حالىقارالىق كينوفەستيۆالدەردىڭ ىرىكتەۋشىلەرى مەن ديستريبۋتورلارىنىڭ قىزىعۋشىلىعىن تۋدىردى.

- مەن پاۆيلونعا قويىلعان قازاقستاندىق كينوتۋىندىلاردان ەرەكشە اسەر الدىم. اسىرەسە قاريا مەن جەتىم بالا تۋرالى باياندايتىن «ارۋاق» ءفيلمىن اتاپ وتكىم كەلەدى. ءقازىر ءبىز قازاق ارىپتەستەرىمىزبەن اتالمىش ءفيلمنىڭ يتالياداعى ديستريبۋتسياسى جونىندە كەلىسسوزدەر جۇرگىزىپ جاتىرمىز، - دەدى يتاليالىق كينوپروديۋسەر فلاۆيو دونيني.

رەجيسسەر قۋات احمەتوۆتىڭ «ارۋاق» ءفيلمى تاعدىردىڭ جازۋمەن ۇشىراسقان قارت اعاتاي مەن جەتىم بالا تۋرالى باياندايدى.

-    يدەيا اۆتورى ءاسانالى ءاشىموۆ. ول 2014 جىلى ماعان ەلدەن شالعاي تۇراتىن جالعىز باستى قارت تۋرالى فيلم ءتۇسىرۋدى ۇسىندى. ءاسانالى اعانىڭ ويى بويىنشا قاريا – دالا فيلوسوفى، ءتۇرلى عىلىمعا قىزىعاتىن ادام،  - دەدى ءفيلمنىڭ رەجيسسەرى قۋات احمەتوۆ.

فيلم بىلتىر وندىرىسكە جىبەرىلىپ، بيىل كوكتەمدە اياقتالعان بولاتىن. تۇسىرىلىمدەر الماتى وبلىسىندا، ىلە وزەنى جاعالاۋىندا وتكەن. ءفيلمنىڭ سەنارييىن تۇركى ەلدەرىنىڭ ەرتەگىلەرى مەن اڭىز-اڭگىمەلەرى جەلىسى بويىنشا قۋات احمەتوۆ پەن وديلشا اگيشيەۆ جازىپ شىققان.

ق ر مادەنيەت جانە سپورت مينيسترلىگىنىڭ قولداۋىمەن وسىمەن ەكىنشى رەت اشىلىپ وتىرعان كانن كينوفەستيۆالىندەگى قازاقستاننىڭ ۇلتتىق پاۆيلونى وتاندىق فيلمدەردى ناسيحاتتاۋعا وڭتايلى الاڭ بولىپ تابىلادى.

بيىل پاۆيلونداعى تانىستىرىلىمدا «قازاقفيلم» كينوستۋدياسى تۇسىرگەن دجەفف ۆەسپانىڭ «امىرە»، بولات قالىمبەتوۆتىڭ «تالان» جانە باسقا دا جوبالارى پرەزەنتاسيالانعان.

«ارۋاق» ءفيلمى جايلى: اعاتاي ەسىمدى قارتتىڭ ەشكىمى جوق. سۇيگەن جارى قايتىس بولعان. ارالارىندا بالالارى بولماعان. اعايىن-تۋىسقاندارى دا قالماعان. فيلمگە ءوز ورتاسىنان بەزىپ، دالاعا بارىپ تۇرۋدى كوزدەگەن قارت كىسىنىڭ ءومىرى ارقاۋ بولعان. ايتسە دە داناگوي، ءپالساپاشىنىڭ جولىندا بالالار ۇيىنەن قاشىپ شىققان بوبەك دەگەن كىشكەنتاي، ەلگەزەك بالا كەزىگىپ، ونىڭ باستاپقى جوسپارىن بۇزىپ كەتەدى.